Friday, November 3, 2017

ഒരു വിവാഹിതനെ പ്രണയിക്കുക എന്നാൽ


ഒരു വിവാഹിതനെ പ്രണയിക്കുക എന്നാൽ
ഊഴത്തിനു കാത്തു നിന്നോളാം എന്ന കരാറിൽ
ഒപ്പു വയ്ക്കുക എന്നാണു..
ഒരു വിവാഹിതനെ പ്രണയിക്കുക എന്നാൽ
അവന്റെ വേളിയുടെ പുലയാട്ടു നിശബ്ദം സഹിക്കുക
എന്ന് കൂടിയാണ്..
ഒരു വിവാഹിതനെ പ്രണയിക്കുക എന്നാൽ
അളന്നു മുറിച്ചു തരുന്ന നിമിഷങ്ങളെ
ഏറ്റവും വലിയ കരുതലെന്നു കാത്തു വയ്‌ക്കേണ്ടതാണ്..
ഒരു വിവാഹിതനെ പ്രണയിക്കുക എന്നാൽ
അത്രമേൽ അടുത്തിരിക്കുമ്പോഴും അവളുടെ വിളികളിൽ
മറുപടികളിൽ സംശയത്തിന്റെ പല ജോഡി കണ്ണുകളെ തിരസ്ക്കരിക്കുക എന്ന് കൂടിയാണ്..
ഒരു വിവാഹിതനെ പ്രണയിക്കുക എന്നാൽ
അവളെന്ന കരുതലിൽ വഴക്കിടുമ്പോഴൊക്കെയും
പിൻവിളിക്കായി വാതിലിൽ കാവൽ നിൽക്കലാണ്..
ഒരു വിവാഹിതനെ പ്രണയിക്കുക എന്നാൽ
കുങ്കുമം ചോദിക്കുമ്പോൾ 'നീ മറ്റൊരുവന്റെ ഭാര്യ'
എന്ന അപമാനം ഓർമ്മപ്പെടുത്തലാണ്..
ഒരു വിവാഹിതനെ പ്രണയിക്കുക എന്നാൽ
അടയാളങ്ങളൊന്നും ശേഷിപ്പിക്കാതെ
ഉമ്മ വയ്ക്കാൻ പഠിക്കലാണ്..
ഒരു വിവാഹിതനെ പ്രണയിക്കുക എന്നാൽ
അവളുടെ നഖപ്പാടുകളിൽ വിരൽ തൊട്ടു
ഹൃദയത്തിൽ ചോര പൊടിയുക എന്നാണ്..
ഒരു വിവാഹിതനെ പ്രണയിക്കുക എന്നാൽ
ഒളിയിടങ്ങളിൽ സ്വപ്ന ഭവനങ്ങൾ വരച്ചു ചേർക്കുക
എന്ന് കൂടിയാണ്..
ഒരു വിവാഹിതനെ പ്രണയിക്കുക എന്നാൽ
അവരുടെ മണങ്ങളിൽ നിന്നും അവന്റേതു മാത്രം
വേർതിരിച്ചെടുക്കുകയാണ്..
ഒരു വിവാഹിതനെ പ്രണയിക്കുക എന്നാൽ
അത്രമേൽ അപമാനിതയായിട്ടും ആ സ്നേഹം
ആവശ്യമാണെന്ന് അശക്തയാകലാണ്..
ഒരു വിവാഹിതനെ പ്രണയിക്കുക എന്നാൽ
പ്രിയമുള്ളയിടങ്ങളിൽ നിന്നും ഭ്രഷ്ടരാകുക
എന്നുമാണ്..
ഒരു വിവാഹിതനെ പ്രണയിക്കുക എന്നാൽ
അവരിടം സ്വസ്ഥമാകാൻ ഉപേക്ഷിക്കപെടുന്നതും
കൂടിയാണ്..
ഒരു വിവാഹിതനെ പ്രണയിക്കുക എന്നാൽ
കണ്ണ് നിറയാതെ കാലിടറാതെ തിരികെ നടക്കുകയാണ്...
ഫെമിനഫറൂഖ്
02-11-2017

3 comments:


  1. അവസാനം എഴുതിയ കാര്യങ്ങൾ വായിക്കുമ്പോൾ നിനക്കു ബുദ്ധി വച്ചു തുടങ്ങി എന്നു തോന്നുന്നു....

    വരികൾക്ക്, വരികളിലെ നിരകൾക്കു , നിന്റെ തിരിച്ചു വരവിന്റെ മണം.... സ്നേഹം മാത്രം നിന്നോട് ��

    ReplyDelete
    Replies
    1. നിനക്ക് എന്താണ് ആവശ്യം ? വരികളിൽ വല്ലാതെ മണപ്പിക്കാൻ നിക്കല്ലേ. ആ മൂക്ക് പിന്നെ വേറെ ഒന്നും മണപ്പിക്കാൻ പറ്റാത്ത പരുവമാക്കും ഞാൻ കേട്ടോടാ തെണ്ടീ !

      Delete
  2. പതിവ് പോലെ തേങ്ങാ ഉടക്കാൻ ഞാൻ തന്നെ വന്നു :)

    ReplyDelete